أخبار الجورنان" …فين جا المغرب

سامي صبير

قال ليك آسيدي .. المغرب من أجمل البلدان .. فين جا المغرب ؟؟ لا ماشي هذا هو السؤال، باش غادي نعرف المغرب؟؟ هذا هو السؤال.

ملي تفيق مع الصباح بكري وتنزل من غرفة تتشبه لبنيقة مولاها كايمص دمك كل شهر، وتشوف الشعب في صباح الليالي ناعسين في جنب الحيط ومغطيين بالكرطون، وتكمل طريقك حتى توقف عند مول الحانوت لي فراس الدرب وتلقى ثمن الزيت تضرب في جوج ما بين ليلة ونهارها، وفلوس المنحة ديال الطالب ومانضة الموظف متتخلص غير الخبز حرفي.
ملي تمشي كل شهر تخلص فاتورة الضوء والماء اللي أصلا مقطوعين عليك العام كامل، وتشوف في الساعة كاتشير للعشرة ونص ومزال الإدارة سادة، وتخدم نص ساعة ويقول ليك الموظف الوقت القانوني كمل !! .. تجلس في العشية في القهوة على حساب صاحبك المعطل، ويسربيك واحد عندوا الدكتوراه في الفيزياء.

ملي تقرأ في الجرنان إعلان لشركة، وتمشي تدفع ليهم السيرة الذاتية ويسولوك شكون باك، ودهن السير يسير، وفي الأخير يقولوا ليك سير حتى نتاصلوا بيك .. تكون راكب في الطوبيس ويطلع سيد كبير في العمر بلحية شايبة، وجلابة مقطعة ودموع نازلة من عينيه، ويقول بغيت صدقة باش نمشي لسبيطار .. يورم عليك راسك من الدوران في الزناقي تقلب على خدمة، وتمشي لسبيطار الحومة اللي الجيران كاملين مجموعين فيه، ومتلقاش الطبيب والدواء الوحيد الموجود هو الفاصمة .. في الصفحة الثانية من الجرنان على الزاوية اليمنى للصفحة كاريكاتير على مسؤول من كحل الرأس نهب ثلاثة الملايين من فلوس الشعب وعفا الله عما سلف، وفي الوسط خبر الحكم على شفار البزاطم بثلاثة سنوات سجن نافذة .. من خلف زجاج النافذة كتشوف على جانب الشارع قاصر كتعرض براءتها بثمن رخص من ثمن بصلة خامجة، وعلى الجانب الأخر من نفس الشارع طفل صغير كيقلب وسط الزبل على عشاه.
ملي يحكي ليك صاحبك المعطل على العصا اللي كال قدام البرلمان، وتفتح الصفحة الثالثة والرابعة حتى تكمل الجرنان ومتلقاش أش وقع قدام البرلمان. 
في اللحظة اللي تكون هاد المشاهد كتكرر بشكل يومي قدام عينيك غادي تكون عرفتي فين جا المغرب.